Մեր մասին

ՍԲՃԿ պատմություն

Սեռական բռնության ճգնաժամային կենտրոնը հիմնադրվել է և գործում է ՀՀ-ում 2008 թվականից։ ՍԲՃԿ ստեղծման պատճառ հանդիսացան երիտասարդ աղջիկների շրջանում հանդիպող սեռական բռնության դեպքերը և երկրում նրանց համար նախատեսված աջակցային ծառայությունների բացը, որը լրացնելու եկավ ՍԲՃԿ-ն:
ՍԲՃԿ-ն ֆեմինիստական սկզբունքներով առաջնորդվող կազմակերպություն է, որի գործունեությունն ուղղված է սեռական բռնության ենթարկված անձանց աջակցությանն ու իրավունքների պաշտպանությանը:

Տեսլական

Ունենալ իրավասահավասարության, խտրականությունից զերծ, արժանապատվության հարգման սկզբունքների վրա հիմնված միջավայր։

Առաքելություն

Նպաստել գենդերազգայուն մոտեցմամբ պետական քաղաքականության ներդրմանը և սեռական բռնության ենթարկված անձի զորեղացմանը։

ՍԲՃԿ կարևոր ձեռքբերումներ՝

ՍԲՃԿ բազմամյա աշխատանքի և ջանքերի շնորհիվ այսօր ՀՀ-ում սեռական բռնության հիմանխնդիրը բարձրաձայնվում է և դարձել է օրակարգային:
ՀՀ Քրեական օրենսգրքի 18-րդ գլխի «Սեռական անձեռնմխելիության և սեռական ազատության դեմ ուղղված հանցագործությունները» հոդվածներում փոփոխությունների նախագծի ընդունում /2014թ. դեկտեմբեր/:
ՍԲՃԿ-ն նպաստել է նաև ՀՀ աշխատանքային օրենսգրքում սեռական ոտնձգության արգելքի ավելացման օրենսդրա

Ծառայությունների տրամադրում:

ՍԲՃԿ-ն մասնագիտացված կառույց է, որը աշխատում է սեռական բռնության ենթարկված անձանց հետ, այդ թվում նաև անչափահասների և նրանց ծնողների: Կառույցում գործում է Թեժ-գիծ ծառայություն /24/7/: Մենք տրամադրում ենք անվճար սոցիալական /սոցիալական աշխատողի խորհրդատվություն, ուղորդում այլ մասնագետների կամ ծառայությունների, դեպքի վարում/, հոգեբանական /անհատական և խմբային թերապիա՝ ուղղված սեռական բռնության տրավմայի հաղթահարմանը/ և փաստաբանական ծառայություններ /փաստաբանի խորհրդատվություն, քրեական գործի հարուցում, քրեադատավարական գործընթացում ներդրավածություն/: Անհրաժեշտության դեպքում ուղորդում ենք նաև բժշկական ծառայությունների՝ գինեկոլոգ, սեռավարակաբան, հոգեբույժ:

Իրազեկում և կանխարգելում:

ՍԲՃԿ-ն իրականացնում է իրազեկման և վերապատրաստման դասընթացներ և հանդիպումներ՝ նախատեսված տարբեր խմբերի ներկայացուցիչների համար: Կարևոր համարելով օգնող մասնագետների զգայուն ու զոհակենտրոն մոտեցումները՝ վերապատրաստման աշխատանքներ են տարվել և շարունակվում ոստիկաննների, քննիչների, դատավորների, սոցիալական աշխատողների, հոգեբանների և այլ մասնագետների շրջանում:
Իրազեկման աշխատանքներ տարվում են ուսանողների, ծնողների, տարբեր տարիքի կանանց և այլոց հետ, ինչպես նաև օգտագործելով սոցիալական մեդիան՝ նպատակ ունենալով կանխարգելելու սեռական բռնության դեպքերը, ինչպես նաև հասանելի դարձնելու մեր ծառայությունները:

Շահերի պաշտպանություն

ՍԲՃԿ շահապաշտպան գործունեության նպատակներն են՝
կոտրել լռությունը, բարելավել իրավական և դատական համակարգերը, նպաստել աջակցության պետական ծրագրերի ներդրմանը, նպաստել կրթական հաստատություններում և աշխատավայրերում սեռական ոտնձգության արգելքի գործուն մեխանիզմների ներդրմանը, խթանել համապետական արձագանքման համակարգի ներդրմանը: Մեր նպատակն է ստեղծել միջավայր, որտեղ սեռական բռնության ենթարկված յուրաքանչյուր անձ իրեն ապահով ու պաշտպանված կզգա խոսելու իր հետ կատարված սեռական բռնության մասին և պահանջելու արդար դատավարություն: